Lög FÍN


1. gr.  Almennt
Félagið heitir Félag íslenskra náttúrufræðinga (FÍN) og á ensku The Union of Natural Scientists in Iceland. Félagssvæði þess er landið allt. Heimili þess og varnarþing er í Reykjavík.
 

2. gr.  Hlutverk
Félagið er stéttarfélag. Hlutverk þess er:

a) Að stuðla að samvinnu, samheldni og góðri fagþekkingu félagsmanna

b) Að vinna að bættum kjörum félagsmanna og gæta hagsmuna þeirra í kjarasamningsbundnum réttindamálum, meðal annars með aðild að Bandalagi háskólamanna - BHM. Félagið gerir kjarasamninga fyrir félagsmenn sína, hvort heldur er á almennum markaði eða hjá hinu opinbera.

3. gr.  Aðildarskilyrði
Félagsmenn geta orðið:

a) Þeir sem hafa lokið a.m.k. Bachelor-prófi eða sambærilegri menntun í náttúrufræðum, arkitektúr eða öðrum tengdum greinum frá háskóla eða hliðstæðum menntastofnunum,

b) Aukaaðild geta öðlast námsmenn í náttúrufræðum, arkitektúr eða öðrum tengdum greinum sem hafa lokið a.m.k. eins árs háskólanámi og ráðnir eru til tímabundinna faglegra starfa. Aukaaðild veitir full félagsréttindi önnur en kjörgengi.

Kjörgengi og kosningaréttur eru háð því að félagsmenn hafi fulla aðild og hafi greitt félagsgjöld til félagsins síðustu 6 mánuði. 

4. gr.  Umsókn
Beiðni um aðild að félaginu skal vera skrifleg/rafræn og send félaginu ásamt afriti af prófskírteini. Framkvæmdastjóri veitir bráðabirgðaaðild að félaginu með fullum félagsréttindum. Vafaatriði eru borin undir framkvæmdastjórn. Allar umsóknir skulu lagðar fyrir næsta stjórnarfund til endanlegrar afgreiðslu. Stjórn getur veitt undanþágu frá 3. grein svo framarlega sem umsækjandi er með Bachelor-próf.

5. gr.  Aðalfundur
Aðalfundur fer með æðsta vald í málefnum félagsins. Aðalfund skal halda eigi síðar en í mars ár hvert og skal hann boðaður öllum félagsmönnum bréflega/tölvupósti með a.m.k. viku fyrirvara. Þeir sem gefa kost á sér til þeirra starfa sem kosið er í á aðalfundi skulu tilkynna stjórn FÍN skriflega um framboð sitt fyrir 1. febrúar.  Allar kosningar í embætti á vegum félagsins, sem fram fara á aðalfundi, skulu vera skriflegar og leynilegar, ef ekki er sjálfkjörið.

Dagskrá skal tilgreind í fundarboði. Aðalfundur er lögmætur sé löglega til hans boðað.

Sérstök verkefni aðalfundar eru:

  1. Formaður flytur skýrslu stjórnar um félagsstarfið á liðnu starfsári.
  2. Lagðir fram endurskoðaðir ársreikningar félagsins og sjóða þess með áritun skoðunar manna reikninga.
  3. Tillögur um lagabreytingar.
  4. Ákvörðun um félagsgjöld.
  5. Stjórnarkjör.
  6. Kosning skoðunarmanna reikninga.
  7. Kosning í stjórn kjaradeilusjóðs.
  8. Kosning siðanefndar.
  9. Önnur mál.

Aðra félagsfundi skal halda þegar stjórn félagsins sér ástæðu til og skulu þeir boðaðir með tryggilegum hætti.

Þá er stjórn félagsins skylt að boða til félagsfundar ef a.m.k. 30 fullgildir félagsmenn krefjast þess skriflega og tilgreina fundarefni. Skal boðað til hans með sama hætti og gildir um aðalfundi.

6. gr.  Stjórn og framkvæmdastjórn
Stjórn félagsins skal skipuð 20 mönnum. Þeir eru formaður, varaformaður og 17 meðstjórnendur, sem kosnir skulu á aðalfundi til tveggja ára í senn. Þá velja trúnaðarmenn einn fulltrúa úr sínum hópi í stjórn til tveggja ára. Á hverju ári skal kjósa hluta stjórnar þannig, að annað árið er kosinn formaður félagsins og níu meðstjórnendur, en varaformaður og átta meðstjórnendur hitt árið. Á sama hátt skal á aðalfundi kjósa tvo skoðunarmenn reikninga, ásamt varamönnum, þannig að árlega sé kosinn einn aðalmaður og einn varamaður. Heimilt er að endurkjósa stjórnarmenn og skoðunarmenn reikninga. Engan má þó kjósa sem formann félagsins oftar en fimm sinnum. Hætti stjórnarmaður á fyrra ári kjörtímabils eða sé hann kosinn til annarra stjórnarstarfa á aðalfundi áður en kjörtímabil hans rennur út, skal annar kjörinn í hans stað til eins árs.  Séu framboð færri en embætti skal stjórn félagsins tilnefna fulltrúa.

Stjórn félagsins kýs ritara, gjaldkera og meðstjórnanda í framkvæmdastjórn úr hópi stjórnarmanna.  Framkvæmdastjórn starfar í umboði stjórnar félagsins og sér um útfærslu á samþykktum hennar.  Í framkvæmdastjórn sitja formaður félagsins, varaformaður, ritari, gjaldkeri og einn meðstjórnandi.  Framkvæmdastjórn félagsins ræður framkvæmdastjóra til að annast daglegan rekstur þess og     ákvarðar launakjör framkvæmdastjóra og formanns.

7. gr.  Samninganefndir, samstarfsnefndir og trúnaðarmenn
Stjórn félagsins er jafnframt samninganefnd þess og fer með gerð kjarasamninga fyrir þess hönd. Hún kallar til samningastarfa trúnaðarmenn, starfsmenn og sérfræðinga eftir þörfum.

Stjórn félagsins skal beita sér fyrir að trúnaðarmenn séu kjörnir á vinnustöðum félagsmanna og boða þá á fund einu sinni á ári og oftar ef þörf krefur.

Þegar fulltrúi trúnaðarmanna í stjórn hefur setið í tvö ár skal fundur trúnaðarmanna haldinn innan mánaðar frá aðalfundi til að velja fulltrúa þeirra í stjórn.  Hætti hann sem trúnaðarmaður skal nýr fulltrúi valinn á fundi trúnaðarmanna til loka tímabilsins.

Samstarfsnefndir starfa samkvæmt ákvæðum kjarasamninga félagsins og taka á ágreiningsefnum við túlkun kjarasamninga svo og endurskoðun stofnanasamninga. Formaður félagsins skipar fulltrúa þess í nefndirnar.

8. gr.  Reikningsár
Reikningsár félagsins er almanaksárið.

9. gr.  Félagsgjöld
Félagsgjöld skulu ákveðin á aðalfundi.

10. gr.  Kjaradeilusjóður
Félagið starfrækir kjaradeilusjóð. Reglur um starfsemi sjóðsins skulu settar á aðalfundi og  honum jafnframt markaður tekjustofn. Eignum kjaradeilusjóðs og tekjum skal haldið algerlega aðgreindum frá öðrum fjármunum félagsins og er óheimilt að verja þeim til annarra þarfa en þeirra sem falla undir reglur um starfsemi sjóðsins.

11. gr.  Siðanefnd
Siðanefnd starfar á vegum félagsins. Aðalfundur setur henni starfsreglur.

12. gr.  Bandalag háskólamanna
Stjórn félagsins skipar fulltrúa á aðalfund Bandalags háskólamanna – BHM. Formaður, og varaformaður í forföllum hans, sitja í formannaráði BHM í samræmi við gildandi lög þess.

13. gr.  Kröfugerð
Meginkröfugerð vegna kjarasamninga skal rædd á vinnustaðafundum og álits fundarmanna leitað.

14. gr.  Kjarasamningar
Kjarasamninga fyrir hönd félagsins skal undirrita með fyrirvara um samþykki viðkomandi félagsmanna á fundi eða í allsherjaratkvæðagreiðslu.

15. gr.  Afsögn stjórnar
Komi til þess að stjórn félagsins segi af sér störfum skal hún boða til félagsfundar. Skal til hans boðað eins og aðalfundar. Á honum fari að lágmarki fram öll þau störf aðalfundar sem nauðsynleg eru við stjórnarskipti, þ.e. dagskrárliðir 1, 2 og 5, sbr. 5. grein.

16. gr.  Úrsögn
Úrsögn úr félaginu skal vera skrifleg og taka gildi um önnur mánaðamót eftir að hún berst félaginu. Úrsögn skal þó ekki taka gildi ef vinnustöðvun hefur verið boðuð hjá vinnuveitanda viðkomandi félagsmanns eða á meðan á vinnustöðvun stendur.

17. gr.  Lagabreytingar
Lögum þessum er aðeins hægt að breyta á lögmætum aðalfundi með tveimur þriðju hlutum greiddra atkvæða. Tillögur til lagabreytinga skulu hafa borist stjórn félagsins fyrir 1. febrúar. Tillögur um lagabreytingar skulu tilkynntar í fundarboði.

18. gr.  Gildistími
Lög þessi öðlast gildi 30. mars 2017. Jafnframt falla eldri lög félagsins úr gildi.