Vísindasjóður FÍN

Vísindasjóður FÍN úthlutar styrkjum einu sinni á ári og er ætlað að styrkja félagsmenn til að sækja námskeið, festa kaup á fagbókum o.þ.h.  Allir sem greitt er fyrir til sjóðsins eiga rétt á greiðslu úr honum í réttu hlutfalli við starfstíma og starfshlutfall, aðeins þarf að sækja um styrkinn á ,,Mínum síðum".  Hægt að skoða hvort greitt hafi verið í sjóðinn fyrir viðkomandi undir iðgjöld á „Mínum síðum“. Hafi sjóðfélagi sótt námskeið eða keypt fagbækur er hægt að draga þann kostnað frá styrknum á skattframtali.  Sé enginn frádráttur frá styrknum er hann skattskyldur. Félagsmenn hjá sveitarfélögum eiga aðild að Vísindasjóði FÍN og einnig þeir sem hafa samið um það í ráðningarsamningi.

 Umsókn um styrk

Tekið er á móti umsóknum í Vísindasjóð frá 1. desember til 31. janúar ár hvert. Styrkurinn er greiddur fyrir tímabilið 1. nóvember til 31. október, árið fyrir úthlutun í samræmi við starfshlutfall og starfstíma.  Hægt er að sækja um fyrir fyrra tímabil hafi viðkomandi ekki sótt um styrk en átt rétt í fyrra.

Umsóknareyðublaðið er aðgengilegt á ,,Mínum síðum" frá 1. desember til 31. janúar ár hvert.  Ef þú lendir í vandræðum þá vinsamlegast sendu inn nafn og símanúmer á netfangið fin@bhm.is og haft verður samband við þig við fyrsta tækifæri. 

Styrkupphæð

Upphæð styrks er í samræmi við starfshlutfall og starfstíma en upphæðirnar í meðfylgjandi töflu miða við fullt starf allan viðmiðunartímann:

Ár
Upphæð
Viðmiðunartímabili
2017-2018  150.000 kr.   1. nóv. 2016-31.okt. 2017
2016-2017  140.000 kr.   1. nóv. 2015-31.okt. 2016
2015-2016 135.000 kr.  1. nóv. 2014-31.okt. 2015
2014-2015 125.000 kr.  1. nóv. 2013-31. okt. 2014
2013-2014 120.000 kr.  1. nóv. 2012-31. okt. 2013

* Félagsmenn FÍN sem starfa hjá Reykjavíkurborg: Í kjarasamningi Reykjavíkurborgar og FÍN sem undirritaður var þann 21. desember 2015 var iðgjald í Vísindasjóð FÍN vegna félagsmanna FÍN sem starfa hjá borginni hækkað úr 1,5% í 1,6%. Vísindasjóðsstyrkur til félagsmanna sem starfa hjá Reykjavíkurborg verður því 156.000 kr. fyrir tímabilið 2017-2018, í samræmi við hækkun iðgjalda frá vinnuveitanda.

Útborgun styrkja

Umsóknir sem berast 17. desember 2017 eða fyrr verða greiddar út 21. desember 2017.  Umsóknir sem berast þann 18. desember 2017 og eftir það verða greiddar út í byrjun febrúar 2018.

Hverjir eiga rétt?

Félagsmenn hjá Reykjavíkurborg, sveitarfélögum og einstaka félagsmenn á almennum markaði eiga aðild að sjóðnum. Félagsmenn FÍN sem starfa hjá ríki eiga ekki aðild að sjóðnum og geta ekki sótt um styrk. Framlag ríkisins í vísindasjóð var aflagt í kjarasamningum 2008.

Félagsmenn í fæðingarorlofi

Félagsmenn sem greitt er fyrir í sjóðinn og hafa tekið fæðingarorlof á tímabilinu fá þann tíma metinn ef þeir hafa merkt við á "Umsóknareyðublaði um fæðingarorlof" að þeir óski eftir því að félagsgjald til FÍN sé tekið af greiðslum Fæðingarorlofssjóðs.   Tilgreina þarf tímabil fæðingarorlofs og hlutfall á umsókninni.

Félagsmenn í óreglulegu starfshlutfalli

Þeir sem starfa í óreglulegu starfshlutfalli verða að veita upplýsingar um starfshlutfall í hverjum mánuði og skal það gert í athugasemdasvæði umsóknarinnar.  Kallað verður eftir þeim upplýsingum ef þær berast ekki með umsókn.

Hvaða gögn eiga að fylgja umsókn?

Engar kvittanir eiga að fylgja umsókn. 

Skattaleg meðferð styrkja

Umsækjendur geta nýtt styrkinn úr sjóðnum til þess að sækja námskeið, festa kaup á fagbókum og fleira. Styrkurinn er forskráður á skattaframtali styrkþega og er talinn fram til skatts eins og aðrar tekjur.  Ef félagsmenn hafa kvittanir sem skatturinn tekur gildar sem kostnað á móti styrknum þá skal draga þann kostnað frá styrknum á skattframtali.  Þá er styrkurinn skattfrjáls.  Sé enginn kostnaður á móti styrknum þá mun styrkurinn verða skattlagður. Til að fá upplýsingar um hvaða kvittanir eru teknar gildar er félagsmönnum bent á að snúa sér til viðkomandi skattstofu eða leita upplýsinga á vef ríkisskattsjóra.

Ítarefni:

Skipulagskrá

  1. Skipulagskrá Vísindasjóðs Félags íslenskra náttúrufræðinga.
  2. Sjóðurinn heitir Vísindasjóður Félags íslenskra náttúrufræðinga. Heimili sjóðsins og varnarþing er í Reykjavík.
  3. Aðild að sjóðnum eiga þeir félagsmenn FÍN sem greitt er fyrir í sjóðinn.
  4. Markmið sjóðsins er að auka tækifæri félagsmanna FÍN til framhaldsmenntunar, þróunarstarfa og sí- og endurmenntunar.
  5. Stjórn FÍN skipar stjórn sjóðsins í eitt ár í senn. Stjórn FÍN skipar sjóðsstjórn á fyrsta fundi stjórnar FÍN eftir aðalfund.  Stjórn er skipuð 4 félagsmönnum sem greiða í sjóðinn ásamt einum fulltrúa úr stjórn FÍN sem er jafnframt formaður sjóðsins.
  6. Stjórn skiptir með sér verkum, setur sér starfsreglur í samræmi við markmið sjóðsins og heldur fundargerðir.
  7. Tekjur sjóðsins eru:
    a)  Framlag atvinnurekanda, samkvæmt kjara- eða ráðningarsamningi
    b)  Tekjur af ávöxtun fjármagns
    c)  Aðrar tekjur
    d)  Sjóðurinn skal ávaxtaður á þann hátt sem stjórn telur hagkvæmast á hverjum tíma, samkvæmt fjárfestingastefnu sjóðsins sem samþykkt er af stjórn FÍN

8.   Reikningsár sjóðsins skal vera almanaksárið. Reikningar skulu endurskoðaðir af löggiltum endurskoðendum og kynntur stjórn FÍN.
9.   Stjórn er heimilt að nýta starfsfólk og skrifstofuaðstöðu FÍN vegna úthlutunar styrkja samkvæmt nánara samkomulagi við skrifstofu FÍN.
10. Stjórn FÍN hefur heimild til að breyta skipulagsskrá Vísindasjóðs FÍN og sé þess þörf skal tilkynna sjóðfélögum um breytingar sem gerðar   eru á skipulagsskrá sjóðsins í fréttabréfi og heimasíðu félagsins.

Samþykkt á stjórnarfundi FÍN þann 3. febrúar 2012

f.h. stjórnar FÍN

Páll Halldórsson, formaður FÍN                     Ína Björg Hjálmarsdóttir, varaformaður FÍN

Starfsreglur

  1. Sjóðurinn greiðir út styrki vegna framhalds-, sí- og/eða endurmenntunar félagsmanna í Félagi íslenskra náttúrufræðinga. Fé sjóðsins má ekki ráðstafa þannig, að það komi í stað samnings- eða lögbundinna réttinda félagsmanna sem stjórnvöld hafa kostað hingað til.  Heimilt er að draga frá kostnað á móti styrkjum á skattframtali (sjá reit 149 á skattframtali), sé slíkur kostnaður ekki fyrir hendi greiðist tekjuskattur af fjárhæð styrksins.
  2. Styrkurinn er greiddur fyrir tímabilið 1. nóvember til 31. október árið fyrir úthlutun í samræmi við starfshlutfall og starfstíma. Einungis félagsmenn í Félagi íslenskra náttúrufræðinga sem greitt hefur verið fyrir í sjóðinn eiga rétt til greiðslu úr honum.   Félagsmenn í fæðingarorlofi sem greiða félagsgjald til FÍN af greiðslum úr Fæðingarorlofssjóði eiga rétt til úthlutunar úr sjóðnum hafi þeir haft aðild að Vísindasjóðnum fyrir töku fæðingarorlofs. Hafi félagsmaður ekki sótt um fyrra úthlutunartímabil getur hann sótt um árið eftir.
  3. Úthlutað er árlega úr sjóðnum og skal úthlutun fara fram í desember og janúar. Stjórn ákveður styrkupphæð fyrir fullan úthlutunarrétt hverju sinni og skal félagsmaður hafa tvo mánuði til að senda inn umsókn, þ.e. frá 1. desember til 31. janúar.  Félagsmenn geta eingöngu framlengt úthlutunarrétt í eitt ár. 
  4. Úthlutun úr sjóðnum er  auglýst í fréttabréfi FÍN í nóvember ár hvert.
  5. Skrifstofa FÍN annast úthlutun og útgreiðslu styrkja í umboði stjórnar. Stjórn er heimilt að endurskoða starfsreglur þessar ár hvert og breytingar skal tilkynna sjóðfélögum í fréttabréfi og á heimasíðu félagsins. 


Reykjavík, 20. desember 2011

Stjórn Vísindasjóðs Félags íslenskra náttúrufræðinga

Kristín Hermannsdóttir, formaður

Erla Hrönn Geirsdóttir, ritari

Lilja Grétarsdóttir, gjaldkeri

Þorsteinn Narfason, meðstjórnandi