Aðalfundur fór afar vel fram en með því helsta sem gerðist var að FÍN lagði fram, í samstarfi við nokkur önnur félög, nokkuð viðamikla lagabreytingartillögu. Breytingatillagan var unnin af starfshópi um endurskoðun á innra skipulagi BHM, sem formaður FÍN var í, og snýr að því að breyta fyrirkomulagi aðalfunda BHM og koma á reglubundnum þingum. Breytingatillagan var samþykkt með miklum meirihluta eftir góðar og gagnlegar umræður. Hér má sjá greinargerðina um tillöguna.
Aukið lýðræði
Með þessari breytingu verður aðalfundur BHM áfram haldinn árlega en vera smærri í sniðum og snúast í meira mæli um rekstur bandalagsins. Á tveggja til þriggja ára fresti verður svo haldið þing BHM þar sem pólitísk umræða um málefni mun fara fram, mögulegar lagabreytingar ræddar og bornar undir atkvæði og stefna bandalagsins mótuð. Þessi þing munu vara í 2-3 daga og vera viðameiri en áður hefur verið, enda er ætlunin með þeim að auka á lýðræði og gefa félagsfólki stéttarfélanna enn meira færi á að hafa áhrif á stefnu bandalagsins og setja þau málefni á oddinn sem á þeim brenna.