Ath. fréttin hefur verið uppfærð.
Í vor á þessu ári gerðu FÍN og Viska samkomulag um stofnun óhagnaðardrifins húsnæðisfélags, fyrst stéttarfélaga háskólamenntaðra. Samkomulagið markar tímamót fyrir húsnæðisöryggi háskólamenntaðra á vinnumarkaði, en eins og staðan er í dag hafa um 40 þúsund háskólamenntaðir utan ASÍ og BSRB ekkert aðgengi að slíkum úrræðum.
Opið fyrir skráningu
Þriðjudaginn 3. nóvember, var opnað fyrir skráningu á biðlista á vef félagsins, ibudafelag.is, og þegar þetta er ritað hafa á annað hundrað manns frá báðum stéttarfélögum skráð sig. Opið er fyrir skráningar á listann til 31. desember 2026.
Uppfærsla: Á þriðja hundrað hafa skráð sig eftir einn og hálfan sólarhring.
Allir sem uppfylla viðmiðin til að fá úthlutað íbúð fara á biðlista, en raðað verður á biðlistann með slembiröðun, og fá þau sem skrá sig upplýsingar um hvar þau eru í röðinni á biðlistanum eigi síðar en 15. janúar. Áætlað er að úthluta fyrstu íbúðum félagsins á árinu 2027.
Stjórn félagsins skipa Brynhildur Heiðar- og Ómarsdóttir formaður, Þorkell Heiðarsson varaformaður, Snorri Páll Blöndal gjaldkeri, Bragi Bergsson og Gerður Jónsdóttir. Stjórn hefur mikinn hug á að vinna hratt og vel að uppbyggingu fjölbreyttra húsnæðiskosta fyrir félagsfólk.
11% af félagsfólki FÍN og Visku falla undið viðmið um almennar íbúðir
„Það er okkur mikil gleði og stór áfangi að vera búin að opna fyrir skráningu á biðlista félagsins,“ segir Brynhildur Heiðar- og Ómarsdóttir, formaður stjórnar. „Með stofnun óhagnaðardrifins húsnæðisfélags stígum við í Visku og FÍN mikilvægt fyrsta skref í átt að auknu húsnæðisöryggi og réttlátara húsnæðiskerfi fyrir félagsfólkið okkar.“
Þorkell Heiðarsson, varaformaður stjórnar, tekur undir með Brynhildi og segir: „Í umræðu um kjör háskólamenntaðra er ítrekað tönnlast á þeirri mýtu að allt háskólamenntað fólk falli utan tekju- og eignaviðmiða laga um almennar íbúðir. Það er af og frá. Í könnun sem Viska og FÍN framkvæmdu við stofnun félagsins kemur í ljós að 11% af rúmlega 8.000 félagsfólki félaganna tveggja falla undir núverandi viðmið um almennar íbúðir. Hér er því um að ræða gífurlega mikilvægt framtak fyrir okkar hóp.“