Félagsdómur staðfestir að trúnaðarmenn skuli hafa greiðan og óskertan aðgang til að sækja nauðsynlega fræðslu
Þann 4. júlí sl. féll dómur í félagsdómsmáli nr. 3/2018 - Alþýðusamband Íslands gegn Akureyrarkaupstað.
Í dóminum reynir á túlkun ákvæða um trúnaðarmenn í kjarasamningi Starfsgreinasambands Íslands og Sambands íslenskra sveitarfélaga og hvort starfsmaður í vaktavinnu eigi rétt á launum án vinnuframlags vegna fyrirframákveðinna kvöldvakta þá daga er trúnaðarmannanámskeið fór fram.
Kjarni ágreinings aðila er hvaða skilning ber að leggja í grein 14.2.9.1 í kjarasamningi aðila sem fjallar um trúnaðarmannanámskeið.
Þar segir: „Trúnaðarmönnum á vinnustað skal gefinn kostur á að sækja námskeið sem miða að því að gera þá hæfari í starfi. Hver trúnaðarmaður hefur rétt á að sækja námskeið. Þeir sem námskeiðin sækja skulu halda reglubundnum launum í allt að fimm vinnudaga á ári enda séu námskeiðin viðurkennd af samningsaðilum. […]“
Trúnaðarmaðurinn taldi sig hafa uppfyllt vinnuskyldu sína með setu á námskeiði en Akureyrarbær taldi svo ekki vera heldur hefði honum borið að mæta til vinnu að námskeiði loknu enda hefði námskeiðið farið fram utan hans vinnutíma.
Niðurstaða Félagsdóms í málinu er skýr og ótvíræð. Krafa um að trúnaðarmaður ynni kvöldvaktir strax í kjölfar námskeiðsins ella sæta launaskerðingu hamlaði rétti hans til að sækja trúnaðarmannanámskeið enda fæli það í raun í sér 16 tíma vinnudag sem samræmist hvorki ákvæðum kjarasamninga né laga. Niðurstaða þessi festir í sessi áralanga túlkun stéttarfélaga um greiðan og óskertan aðgang trúnaðarmanna til að sækja nauðsynlega fræðslu.
Ákvæðið í umræddum kjarasamningi er efnislega sambærilegt ákvæðum um trúnaðarmenn í kjarasamningum BHM félaga á opinberum markaði. Óhætt er að ganga út frá því að sömu sjónarmið og reyndi á í málinu eigi við um trúnaðarmenn aðildarfélaga BHM.
Dóminn má nálgast hér .
